منتدى الطلاب السودانيين بجامعة الإمارات العربية المتحدة

دا شمالنا يا الداير تشوفو..((شمال السودان))

اذهب الى الأسفل

دا شمالنا يا الداير تشوفو..((شمال السودان))

مُساهمة  ود السر في الخميس ديسمبر 24, 2009 7:16 pm

شوف شمال اهلي الافاضل ليل نهار في العزة رافل
فيه مضبوع سر الاهي بدري كان تحلمبو بابل
حاضنو هو النيل بي محنه وبس عشانو هو جانا مايل
وانحنى وغير مسارو ولفة ابو حمد الدلايل
كل منابع الطيبه فيه نالبهن اعلى المنازل
وبي شعر محفوظ مخلد في دواوين الاوائل
دا اليطوف هيبة ربوعو يستفيد لو يبقى ماهل
يا يشملو نسمه عابري ماخده ريقه من الخمايل
ويا ملك وجدانو منظر يقتل الهم والبهادل
والرسول قال في حديثو ومافي اصدق منو قايل
الخدار والمويه جمبو بلثم الهم والمشاكل
يا سمعلو قصيده صادقي ترسل الاشواق قوافل
يا نغم طمبور حنين يستقر جوه الدواخل
ويا قمريتا تقوقي فوق تميره صبطه شايل
يا قعد بي ايدينو يشرب مويه صافي من الجداول
ويا يشوفلو كمان مزارع شايل الطوريه نازل
بي نشاط قاصد زراعتو والصعب بيشوفو ساهل
ويا كمان متع عيونو بي حسان زي الارايل
زوق وطيبه ادب خيالي في عفاف ما منو مايل
ويا كمان لاقوهو اهلنا بي كرم من غير مقابل
وروهو انو الدنيا لسع فيها خير وانبل خصايل
يكرموك لو جيته فوقم يجبروك لو ماكا نازل
ده الشمال يالداير تشوفو بالنهار الفيهو حاصل
اما في وقت الاماسي ليلو ضمه جميل وحافل
نتفق من بدري شله ونطلع القيزان قوافل
فيها يجمع شملنا في رباط زي العوائل
ونبدا نسأ ل عن بعضنا يا محمد وينو عادل
وشوفو يا ناس وين سيد احمد اصلو زولا ديمه ماهل
ونمسك الطمبور ننقرش لحن تنهاربو المفاصل
ونحن في عزت قعادنا يبدا واحد داير يجادل
وبي محنخ نقولو ياخي .. يا فلان خليك عاقل
خلنا النسمع معاكا ..اشتهيت بس اسي كامل
ويا فلان قلك قصيده تروي ايا منا القواحل
جايه من وجدان وصادقي ليها تهتز الجنادل
وفي الختام نطرب نغني وما بنعرف قيل وقايل
ده الشمال يالداير تشوفو رغم وصفي انا ماهو كامل
ده الكمال لله وحدو لا بينوم لا بتلقى قافل
avatar
ود السر
عضو مجلس الشرف

عدد المساهمات : 9
تاريخ التسجيل : 24/12/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: دا شمالنا يا الداير تشوفو..((شمال السودان))

مُساهمة  SaTti في الخميس ديسمبر 24, 2009 7:47 pm

والله طولنا من الطمبوور طووول
avatar
SaTti
عضو إداري

عدد المساهمات : 39
تاريخ التسجيل : 23/12/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: دا شمالنا يا الداير تشوفو..((شمال السودان))

مُساهمة  حمود الطريفي في الإثنين ديسمبر 28, 2009 1:25 am

والله زكرتونا السودااااااان


تسلم ود السر ...


والله ما قصرت ..
avatar
حمود الطريفي
أعضاء الرابطة
أعضاء الرابطة

عدد المساهمات : 129
تاريخ التسجيل : 27/12/2009
العمر : 26
الموقع : نسيت

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى