الى كل بايركس ...(كيف تصطادين عريسا)

**Awab.a** الأربعاء فبراير 10, 2010 11:46 pm

الي كل سحلية عاضه فى حلق اهلها وما عارفه تتصرف
مع انهم خاتين معاها اختها مجانا
لترويج البضاعه البايره فى البيت
اليكى
(كيف تصطادين تمساحا دون اللجوء للاساليب القديمه والمعهوده)
للاجابة على هذا السؤال اليك الاتى :-
اهم نقطة نشنى على العجوز (ام التمساح ربى يحرسو) ونفذى الاتى
1/ خليكى لاصقه جم امك وما تتهابلى وتجرى وراء البناات ما اتهبلتى سنين شن سويتى
2/ امشى وانتى خاته راسك بين كتافينك وما ترفعى ابدا حتى ولو صار وشك كلو مخاخيت (خلى الفكس فى متناول اليد)
عشان يقولو مؤدبه وما متكبره
3/ كلمة خالة خليها على لسانك وخاصة لى ام التمساح عشان تحس يالتميز من بقية العجايز
(مافى مانع تنادى واحده تانية بخالتك عشان كان ما نجحت الخطة مع نمبر ون يكون عندك بديل سريع العمر جارى
4/ اذا بدت امك تتكلم اديها نغزة بى كوعك عشان تدخلك فى الموضوع
حتى ولو كنتى ماكى طايقه زى المثل ما بقول
(كترت الكلام تكسر الحديد) عارف المثل ما ليهو داعى بس ما لقيت غيرو
5/اخوانك الصغار اجرى وراهم واعملى انك مهتمه بيهم كأنك امهم لان هذا يوحى للعجوز ام التمساح انك حنينه على اولادك (ربنا يخلف عليك)
6/ كل شىء تاكلوو امك ويكون حلو خليها تقول والله نفس الاكلة البتسويها بتى(حتى ولو كانت اكلة من المطعم الصينى)
7/ كان جيتى تمدى يدك (اريتا بالكسر) اتوجعى واتنهدى (ما بى قوة صوتك شين) وخلى امك تقول يديها العافية انا اقوليها ما تنضفى الشارع لكن هى كاتلاها النضافه (وكان جينا للجد تلاقيك اوضتك ما قادره عليها)
8/ بعدين لما تقعدى اقعدى على اطراف الخلفيات وشدى طولك زى البالعه ليك قصبه عشان ما ينقص من طولك ولا سنت واحد (للقصيرات)
9/ اذا تكلموو الحريم عن اى عرس اكتمى نفسك لغاية ما تحمر خدودك
عشان يقولو البت خجلانه (انا ما عارف مع لون زينب دا خدودك يحمرن كيف)
بس هوى ما تكتمى نفسك للنهاية بعدين تروحى فيها وتودينا فى داهية
10/بعدين يا زوله مهما كان الموضوع حماسى خليكى راسيه وما تنحشرى فيهوو لان الحشريه تجيب اجل الخطة كلها
11/ بعدين شعيراتك ديل خليهن مفرودات اوعك من الطاير والمنكوش اصل العجايز ديل جنهن والشعر المنكوش
12/اها كان قالت العجوز (ام السجم ) بأى رأى كان سياسى ولا اقتصادى ولا ضدى ولو كان ماسخ وما منطقى وافقى عليهوو حتى ولو قالت امبارح بوش كان فاطر معانا تقولى بكل حسن نيه
وليه يا خالة ما كلمتينا نجى نساعدكم
13/ فى اى عرس اذا كانت ام التمساح قاعده اوعك من النطيط والرقيص اهمدى واتلمى واعتبرى الرقيص عيب
(يا زوله بعدين ما حترقصى رقيص)
14/اها كان جات سيرة السوق (ياهوو ملح ونسة الحريم سوق السجم دا)
خلى امك (ربنا يصبرا عليكى) تقول بناتى اصلن ما بمشن السوق
واى حاجه بجيبا ليهن ابوهن(وتلاقيك حايمه السوق زى بتاع الترمس)

احتمال وارد
ممكن تكون العجوز ام صاحبنا خاتا عينه على واحده تانيه والسويتى راح شمار فى مرقه
لالالا يا زوله ما تصدقى بعد السويتى دا العجوز وقعت لى شوشتا فى حبك

نواصل
اها بعد اقتناع امو بيك نجى للتمساح
اتلمى وكنى فى بيتكم واوعك تمرقى تتحاومى اها كان جاكم العريس خلى ابوك يقول ليهوو
والله لازم تشوف البت وتاخد راحتك عشان ما تقول غشيتونى
بس هى تنكسف تظهر عليك كدى ادينا مهلة نقنعا
واها قبل ما يجى اليوم اليشوفك فيهوو بحوالى اسبوع (حسب شنات وشك)
لفى من كوافير لى كوافير ومن صبغة شعر لى فرد ضهر وتنظيف طبلون
ونتف شعيرات العيون وما تنسى شعيرات الرقبه التحت الدقن
واصلك ما تقصرى فى روحك
دا عريس يا بت وجا بعد وجع
ولما يجى مقطوع الطارى خلى اخوك يكون معاك واقف جنب الشباك يضارى الضو عشان العريس يخجل منه وما يطول بحلقه ويظهر المخبى ولا ضو الشباك
يبين المدسى
وذلك تطبيقا لنظرية
اللمحة ضبحه
(ما تقولو لى جبتها من وين)
بعد العرس يشوفك كيف على حقيقتك والله دى مشكلتك دبرى راسك
اها بعد دا يجى ابوك داخل يا زوله كان حظك سمح الجنا ينط فى راس ابوك وهاك يا بوسه لامن يقرب يشفط مخوو
والعرس متين يا عمى
((اللهم ارحمه فقد كان ولدا بارا بأمه))
اها الله يوفقك وما تنسينا من حلاوة العرس
بس حسك عينك تقولى لى زول منو العلمك دا
بعدين وحده من اياهم تستعمل نفس الخطه على
تحزير
ابعدى من العجايز المتعلمات البلبسن الجزمه لون الشنطه ماشا مع الفستان
ديل مصايب دايرن خطط جهنمية

نصيحه
صحباتك بلاحظن التغيرات الحاصلة ليك اوووعك سرك فى بير ولا العريس بطير

يلا كل عرس وانتن بايرااات

منقوع للفائده العامه

DR Fox الخميس مارس 25, 2010 8:54 pm

هع هع هع هع هع
ما قصرتا فيهم
نصااائح مظبوووطه

ملك روحي السبت مارس 27, 2010 5:48 am

هههههههههههههههههههههههههههههههههه
اها يا حاااتم التاني.......

موضوع البايركس دا اتكلمنا فيهو لمن قلنا بس في منتدانااا الاول ولا شنو ياافوكس هههههههه
بس الفرق انو دي نصاااائح ههههههههههههههههههههه

وانت يافوكس اضحك بس متعود من المنتدى الفات ههههههههههههههههههههههههه

لكم مني كل الاحترام والتقدير

تحيااااتي....

Sara Mahmoud الإثنين فبراير 07, 2011 3:23 am

حلووووووو نفس كلام ماما بالحرف Very Happy

ملك روحي الخميس مارس 31, 2011 7:32 pm

ههههههههههههههههههههههههههههههههههههههههههه
الامهات والزمن ضد كل بايركس

تحياتي يااا سارة ومرحب بيكي في المنتدى

الى كل بايركس ...(كيف تصطادين عريسا)

الى كل بايركس ...(كيف تصطادين عريسا)

رد: الى كل بايركس ...(كيف تصطادين عريسا)

رد: الى كل بايركس ...(كيف تصطادين عريسا)

رد: الى كل بايركس ...(كيف تصطادين عريسا)

رد: الى كل بايركس ...(كيف تصطادين عريسا)