منو القال ليك بلدنا جعان؟؟

القال ليك بلدنا جيعان ......؟؟؟؟؟؟؟؟




عينى باردة وانا بحضر فيها القوات الجوية والبرية والدبابة البشير والزبير ....

عينى باردة وانا بقرا خبر تصنيف الاتحاد الافريقى للسودان بانه اكبر ثالث دولة فى العتاد الحربى فى افريقيا

عينى باردة وانا بسمع انو عجز ميزان المفوعات نزل من 113 % الى 7.8 %


عينى باردة وان بسمع انو السودان اصبح يصنع طائرات حربية

عينى باردة وانا بسمع انو جياد بدأت التصدير للخارج ( سيارات وشاحنات )

عينى باردة وانا بسمع انو السودان اتأهل لنهايات غانا 08
عينى باردة وانا بسمع انو الشرطة الامنية استطاعت القبض على عميل امريكى فى الخرطوم
عينى باردة وانا بسمع انو الامريكان اقرو انو جهاز الامن والمخابرات الوطنى الوحيد من الاجهزة الماقدروا يخترقوه ويزعوا طوابير داخل الجهاز
عينى باردة وانا بسمع انو الشركة السودانية للاتصالات على اعتاب رمى كيبل بحرى يعتبر اكبر كيبل بحرى فى افريقيا من بوسودان البحر الاحمر الى مورتانيا البحر الابيض المتوسط
عينى باردة وانا بسمع انو السودان ثالث دولة فى العالم تستخدم الجيل الثالث للاتصالات
عينى باردة وانا بشوف كل يوم استثمارات جديدة .... ( بنك السلام _ بنك الامارات والسودان - بنك المال المتحد ) بالمناسبة بنك المال المتحد هو بنك اصلا كويتى فرعى الرئيسى فى السودان
عينى باردة وانا بشوف الحلم اصبح حقيقة ..... سد مروى .... الانجاز والاعجاز .....
عينى باردة وانا بشوف سد كجبار ......
عينى باردة وانا بشوف مخطط السنط ..... المنطقة من الكبرى القديم ولحدى كبرى الفتيحاب
عينى باردة وانا بشوف الكبارى ..... كبرى المنشية ... الدباسين .... توتى .... المنك نمر ....
واخيرا كبرى رفاعة
عينى باردة وانا بشوف المخططات السكنية ناس اراك و ياسمين والبجراوية ....
شكلها عينى حتبرد كتير ..... وصاحب العقل يميز ..... هل نحن حقا نستحق هذا الانجاز .... ان كانت الاجابة نعم .... اذا حب سودانك .... واخلص العمل والنية .... وما مهم الحاكمنا منو .... وننسى شوية ثقافة الماضى والوقوق على الاطلال ..... وثقافة يا حليل ..... وزمان كنا
مهما كنا زمان .... برضو الان افضل ..... مع بعض الاخفاقات .... ( ضريبة التقدم والتنمية )
مشكلتنا .... لو الواحد عطش بنعل ابو الحكومة .... ياخوانا نبطل الشماعة دى شوية .... وانت لو كنت افضل من الحاكمنا .... كنت بقيت انت رئيس .... ؟؟؟
ولا انا غلطان .؟؟؟؟؟؟
عينى باردة على السودان ومزيد من التقدم والى الامام والله حافظكم ومغطيكم

[ندعوك للتسجيل في المنتدى أو التعريف بنفسك لمعاينة هذه الصورة] أنا عيني عليك باردة من كل شر وتسلم شديـــــــــــــد على المعلومات السمحة دي [ندعوك للتسجيل في المنتدى أو التعريف بنفسك لمعاينة هذه الصورة]

فوق فوق سودانا فوق....
اصلو بلدنا ديك ما في زيها...
الله اكبر.

احيييك على الموضوع.....لاكن
انت ما ملاحظ انو عينك بااااردة بس على الجيش والدفاع ...... وووين الشعب
انا اقول ليك انا عيني باردة في شنو....

انا عيني باردة على اراضي البلد البقت كلها للمستثمرين
انا عيني باردة على الصحة الما فيشااااا
عيني باردة على التعليم الما فييهوو مستوى بقى
عيني باردة على الناس التعبانة والجعانة
انا عيني بارد على الجريمة الي انتشرت في البلد
عيني باردة على النسبة الاعلى لي مرض الايدز في السودان
عيني على الشباااب الضايع
عيني باردة على العادات الانتهت
عيني باردة على السمعة البقت في الحديدة
عيني باردة على الطيارة المنتهية
عيني باردة علينا السايبين بلدنا وقاعدين في بلدة الغربة
عيني باردة على العيانين الهناك
عيني باردة على الناس البفتشو الاغتراب
عيني باردة على الخريجين المالاقيين شغل
عيني بادرة على الناس البتلتلوهم علشان ياخدو شهاداتم
عيني باردة على الناس الماقادرين يسافرو يشوفو اهلم .

تحب اقول زيادة ولا كفاية كدا....

واتمنى تكون فعلا عيني باردة على الحاجات دي كلهااا بس بعد التحسيييين


تحياتي...
ملك روحي

ضربة قاضية.